Frá og með áramótum er börnum yngri en 10 ára óheimilt að fara í sund nema í fylgd með syndum einstaklingi sem er 15 ára eða eldri.
Ný reglugerð um öryggi á sundstöðum tók gildi um áramótin. Í reglugerðinni eru gerðar ítarlegri kröfur um öryggiskerfi og laugargæslu en gert var í eldri reglugerð. Þá eru auknar kröfur gerðar um öryggi barna og sérstakar kröfur gerðar til sundlaugavarða, kennara og þjálfara.
Sundstöðum er gert að hafa stöðuga laugargæslu meðan gestir eru í laug og verður laugarvörðum óheimilt að sinna öðrum störfum samhliða. Einnig er gerð ríkari krafa til starfsfólks sundstaða varðandi starfsþjálfun og sérhæfða skyndihjálp. Starfsmenn sem sinna laugargæslu, sundkennarar og sundþjálfarar verða að hafa náð 18 ára aldri og standast hæfnispróf til að fá að sinna sínum störfum.
Barnahópar skulu vera sérstaklega auðkenndir til að auðvelda ábyrgðarmanni hópa að fylgjast með hverju barni og þá mega sundkennarar, sundþjálfarar og leiðbeinendur ekki víkja frá laug fyrr en allir nemendur yngri en fimmtán ára eru farnir í búningsklefa.
Reglugerðin gildir um alla sund- og baðstaði sem almenningur hefur aðgang að, baðstofur og setlaugar en nær ekki til sundlauga og setlauga sem eingöngu eru ætlaðar til einkanota.