Glans opnaði nýja, sjálfvirka bílaþvottastöð hjá Olís á Selfossi síðastliðinn föstudag. Vegleg opnunarhátíð var við stöðina á laugardag þar sem þau Ingunn Svala Leifsdóttir, forstjóri Olís og Sveinn Ægir Birgisson, formaður bæjarráðs Árborgar, klipptu á borða og opnuðu stöðina formlega.
Gestum og gangandi var boðið upp á kaffi og kökusneið, börnin fengu nýja íspinnan „Olís með dýfu“ og Magnús Kjartan söngvari Stuðlabandsins tók nokkur lög.
„Við erum ótrúlega ánægð að hafa opnað hér þessa glæsilegu bílaþvottastöð og óskum Selfyssingum og öðrum íbúum Árborgar til hamingju með Glans,“ segir Ingunn Svala.
„Þessi stöð er annar áfangi þeirrar vegferðar sem við erum á með Glans og innan skamms munum við einnig opna þvottastöðvar á Olís við Gullinbrú og á Akureyri,“ bætir hún við en stöðin á Selfossi er önnur Glans-stöðin sem Olís tekur í notkun. Fyrr á þessu ári var fyrsta stöðin opnuð við Langatanga í Mosfellsbæ.
Sveinn Ægir er ánægður með þetta framtak hjá Olís. „Ég óska íbúum til hamingju með þessa glæsilegu þjónustu. Þetta er enn ein rósin í hnappagatið í þjónustu Olís við íbúa og gesti hér í sveitarfélaginu, og alla sem fara hér um, allan sólarhringinn,” segir Sveinn Ægir.
