Um klukkan 20:30 í gærkvöldi barst lögreglunni á Suðurlandi tilkynning um göngumann sem hafði lent í hremmingum í Sveinsgili, skammt frá Landmannalaugum.
Fjölmennt lið björgunarsveita hélt á staðinn og stóð leit yfir í um fimm klukkustundir.
Þyrla Landhelgisgæslunnar var boðuð á vettvang til þess að ferja fjarskiptabúnað á svæðið, en mjög slæmt fjarskiptasamband er á þessum slóðum. Á flugi sínu yfir svæðið fundu starfsmenn Landhelgisgæslunnar manninn, þar sem hann veifaði til þeirra vasaljósi, og var hann tekinn um borð í þyrluna.
Manninn sakaði ekki en hann var fluttur með þyrlunni til Reykjavíkur blautur og kaldur.