Þyrla sótti slasaðan mann á Selfossflugvöll

Þyrla Landhelgisgæslunnar tekur á loft frá Selfossflugvelli í kvöld. sunnlenska.is/Guðmundur Karl

Eina starfhæfa þyrla Landhelgisgæslunnar var kölluð út síðdegis í dag vegna vinnuslyss í umdæmi lögreglunnar á Suðurlandi.

Þar slasaðist einn maður og var hann fluttur með sjúkrabíl á Selfossflugvöll. Maðurinn var færður um borð í TF-GRO sem flaug með hann á Landspítalann. Þyrlan flaug frá Selfossi kl. 18:26 og lenti í Reykjavík rétt fyrir kl. 19:00.

Á meðan þyrlan var í útkallinu barst henni önnur hjálparbeiðni vegna umferðarslyss undir Ingólfsfjalli. Meiðsli þeirra sem þar voru á ferðinni voru minni en talið var í fyrstu og því ekki þörf á þjónustu þyrlunnar í því tilviki.

Fyrr í dag flutti þyrlan mann á sjúkrahús í Reykjavík sem slasaðist í öðru vinnuslysi í uppsveitum Árnessýslu.

Fréttin hefur verið uppfærð

Fyrri greinSkáldastund í streymi frá Húsinu
Næsta greinHríðarveður í kvöld og nótt