Rétt upp úr klukkan 6 í morgun bárust björgunarsveitum á Suðurlandi boð um að bíll hefði lent í Markarfljóti. Þegar björgunarfólk kom á staðinn var ökumaður bílsins kominn út úr bílnum, og hékk utan á honum.
Björgunarfólk setti bát á flot og komst að bílnum gat komið ökumanninum upp á þak bílsins. Ökumaðurinn, kona sem var ein á ferð, var orðin köld og nokkuð skelkuð.
Þyrla Landhelgisgæslunnar hafði verið kölluð út og var ákveðið að bíða eftir þyrlunni í stað þess að freista þess að koma konunni um borð í bátinn. Þyrlan kom á staðinn upp úr klukkan 7 og hífði ökumanninn upp og flutti á Landspítalan.
Björgunarsveitir unnu svo að því að ná bílnum upp úr ánni, sem tókst tæpri klukkustund síðar.
Svo virðist sem bíllinn hafi lent á vegriði við brúna, þar sem það er leitt í jörð, og kastast þaðan út í ána. Straumurinn bar bílinn um 200 metra niður eftir fljótinu áður en hann stöðvaðist á grynningum.
