Eldur kviknaði í plaströrum á geymslusvæðinu við Langasand á Hellu á þriðja tímanum í dag og í upphafi var allt tiltækt lið Brunavarna Rangárvallasýslu kallað út vegna þess.
Viðbragð brunavarna var síðan minnkað en samkvæmt upplýsingum frá lögreglunni á Suðurlandi gekk vel að slökkva eldinn. Þykkan, svartan reyk lagði frá vettvangnum en talsvert magn af rörum og plastefni varð eldinum að bráð.
Ýmissa grasa kennir á geymslusvæðinu sem er sameiginlegt fyrir íbúa og fyrirtæki á Hellu. Eldurinn breiddist ekki út að ráði en svæðið er afgirt og urðu meðal annars skemmdir á girðingunni.
Lögreglan á Suðurlandi rannsakar upptök eldsins.
