Björgunarsveitin Ingunn á Laugarvatni og Hjálparsveitin Tintron í Grímsnesi fengu útkall klukkan 5:22 í morgun þar sem ferðalangur óskaði eftir aðstoð á Lyngdalsheiði.
Þar var um að ræða konu sem hafði dvalið í snjóhúsi á heiðinni í nótt og hafði hún gengið frá snjóhúsinu í blindbyl í um það bil tvær klukkustundir. Konan hafði ætlað að komast í bílinn sinn sem var lagt skammt frá fjallaskálanum við Kringlumýri en farið af leið og fann björgunarsveitarfólkið hana nokkuð vestar á heiðinni.
Í Facebookfærslu Ingunnar segir að aðgerðir hafi gengið vel á staðnum og konan var fljótlega komin inn í hlýjan bíl.