Fuglaflensa hefur verið staðfest í þremur villtum fuglum sem fundist hafa dauðir á Suðurlandi hafa undanfarna daga.
Um er að ræða heiðagæs við Hornafjörð, hrafn á Skeiðunum og súlu rétt við Strandakirkju í Selvogi.
Þá hafa heimilishænsni á bóndabæ á Skeiðum, þar sem hrafninn fannst, sýnt sjúkdómseinkenni og voru fuglarnir allir aflífaðir í dag. Sýni hafa verið tekin úr hænsnunum og er beðið niðurstöðu rannsóknar.
Þetta kemur fram í tilkynningu frá Matvælastofnun, sem hefur virkjað viðbragðsáætlun um viðbrögð og varnir gegn smitandi sjúkdómum í fuglum.
Fuglaflensuveiran sem staðfest hefur verið í villtum fuglum er af gerðinni H5. Meinvirkni veirunnar er ekki þekkt en beðið er niðurstaðna frekari greiningar frá erlendum rannsóknarstofum.
Matvælastofnun brýnir alla alifuglaeigendur til að verja þá fyrir smiti frá villtum fuglum, m.a. halda undir þaki og girða af. Almenningur er hvattur til að tilkynna um dauða villta fugla sem finnast á víðavangi ef ekki er augljóst að þeir hafi drepis af slysförum. Best er að tilkynna í gegnum ábendingarkerfi á heimasíðu Matvælastofnunar.
Þau afbrigði veirunnar sem nú er mest um í nágrannalöndum okkar (H5N1) hafa ekki valdið sýkingum í fólki. Ekki er talin hætta á að smit berist í fólk við neyslu eggja eða kjöts af alifuglum. Líkurnar á smiti frá fuglum í fólk eru því litlar en þó er aldrei hægt að útiloka smit og fólk þarf ávallt að gæta sóttvarna við handfjötlun á veikum og dauðum fuglum.