Veginum yfir Hellisheiði var lokað á fjórða tímanum í dag en þrjú umferðarslys urðu á Heiðinni með skömmu millibili, ein bílvelta og tveir árekstrar.
Blindhríð er á veginum og fljúgandi hálka. Einn var fluttur á slysadeild á Selfossi eftir óhöppin á Heiðinni í dag en þar var um að ræða tvær aftanákeyrslur og eina bílveltu að sögn Jóns Þórs Jóhannssonar, varðstjóra hjá Brunavörnum Árnessýslu.
Vegurinn er ennþá lokaður en viðbragðsaðilar hafa lokið störfum á vettvangi. Umferð er beint um Þrengslaveg en þar eru hálkublettir og skafrenningur.