Þrír sextán og sautján ára drengir voru í bílnum sem lögreglan á Suðurlandi stöðvaði með því að leggja fyrir hann naglamottu á Suðurlandsvegi við Selfoss í gærkvöldi.
Drengirnir eru grunaðir um að hafa stolið bílnum á Rangárvöllum í gær og ekið á Hvolsvöll þar sem þeir eru grunaðir um að hafa hnuplað áfengi á veitingastað. Þeir virtu ekki stöðvunarmerki lögreglu þegar til stóð að hafa afskipti af þeim og óku sem leið lá vestur eftir þjóðvegi 1 í átt að Selfossi þar sem akstur þeirra var stöðvaður með þvi að leggja naglamottu yfir veginn. Ökumaðurinn sinnti í engu stöðvunarmerkjum lögreglu og ók á köflum á um og yfir 140 km/klst hraða.
Lögreglan gerði miklar ráðstafanir á meðan á eftirförinni stóð og voru klippubíll frá Brunavörnum Árnessýslu og sjúkrabifreiðar frá HSU í viðbragðsstöðu við akstursleið drengjanna ef slys yrðu á fólki en töluverð umferð var um Suðurlandsveg á þessum tíma.
Ætluðu að forða sér á hlaupum
Naglamottur eru búnar rörnöglum sem verða eftir í dekkjum bifreiða sem yfir þær aka þannig að loft sígur rólega úr hjólbörðunum og var bifreið drengjanna á fjórum loftlausum skömmu eftir að henni var beygt inn á Langholt á Selfossi og þar á bak við húsnæði Matvælastofnunar. Þeir voru handteknir er þeir hugðust forða sér á hlaupum af vettvangi.
Að lokinni upplýsingagjöf og töku blóðsýnis úr ökumanni voru drengirnir vistaðir á viðeigandi stofnun vegna aldurs þeirra.
Margir teknir fyrir hraðakstur
Samkvæmt upplýsingum frá lögreglunni á Suðurlandi hafa margir ökumenn verið stöðvaðir fyrir hraðakstur síðustu tvo daga. Alls hafa 34 aðrir ökumenn verið kærðir fyrir að aka of hratt á Suðurlandi í þessari viku og þrír þeirra mælst á 146, 148 og 150 km/klst hraða en aðrir á bilinu frá 110 til 135 km/klst hraða. Flestir þessara ökumanna eru á ferðinni í Rangárvalla- og V-Skaftafellssýslum eða 24 talsins.