Í síðustu viku voru verðlaun veitt í Ensku smásagnakeppninni 2020 sem Félag enskukennara á Íslandi (FEKÍ) heldur árlega.
Nemendur frá Grunnskólanum í Hveragerði unnu til þriggja verðlauna en í flokknum 5. bekkur og yngri hlaut Sigurður Grétar Gunnarsson heiðursviðurkenningu og í flokknum 6.-7. bekkur hlaut Kveldúlfur Ari Ottóson fyrstu verðlaun og Hrafnhildur Sif Gunnarsdóttir þriðju verðlaun.
Keppnin hefst á hverju ári á evrópska tungumáladeginum þann 26. september og fer þannig fram að nemendur skrifa smásögur á ensku út frá ákveðnu þema, sem að þessu var A Time for…
„Þátttaka Grunnskólans í Hveragerði í landskeppninni er löngu orðinn fastur liður í skólastarfinu og eru nemendur mjög áhugasamir um sögugerðina. Gaman er að segja frá því að skólinn hefur átt vinningshafa í landskeppninni frá árinu 2012, eða í 9 ár samfellt. Vart þarf að taka fram hve stolt við erum af nemendum okkar í gegnum tíðina en að þessu sinni vorum við svo lánsöm að eiga þrjá verðlaunahafa,“ segir Ólafur Jósefsson, enskukennari.
Verðlaunaafhendingin fór fram við hátíðlega athöfn að Bessastöðum þar sem forsetafrúin Eliza Reid tók á móti vinningshöfum og afhenti verðlaunin ásamt stjórn FEKÍ.