Umhverfisnefnd Ölfuss veitti á dögunum þrenn verðlaun fyrir snyrtilegustu garða sveitarfélagsins. Verðlaunin eru veitt þeim íbúum sem með alúð, metnaði og natni leggja sitt af mörkum til að fegra nærumhverfi sitt og skapa fallegt og aðlaðandi samfélag.
Sigríður Stefánsdóttir og Ragnar Óskarsson í Eyjahrauni 10 fengu viðurkenning fyrir einstaklega fallegan og snyrtilegan garð þar sem umhirða lóðar og húss er öll til fyrirmyndar og eigendum til mikils sóma. Þau hafa byggt upp og ræktað garðinn frá upphafi eða frá 1980 þegar þau fluttu í húsið.
Guðbjörg M. Kristjánsdóttir og Þorvaldur Þór Garðarsson í Básahrauni 22 fengu viðurkenningu fyrir fallegan og snyrtilegan garð þar sem umhirða lóðar og húss er öll til fyrirmyndar og eigendum til mikils sóma. Skipulag garðsins er mjög flott og samspil timburs og hellulagnar skemmtilegt.
Dóróthea Róbertsdóttir og Richard Magnús Karlsson á Skálafelli fengu viðurkenningu fyrir einstaklega fallegan og skemmtilegan garð í dreifbýlinu. Allt umhverfi hússins er til fyrirmyndar og eigendum hefur tekist mjög vel að láta palla, stíga, og gróður flæða vel saman sem gefur einstaka upplifun á lóðinni.
„Fallegir og vel hirtir garðar setja ekki aðeins svip á einstök heimili heldur hafa einnig áhrif á heildaryfirbragð sveitarfélagsins. Þeir endurspegla umhyggju íbúanna fyrir umhverfi sínu og sýna hversu miklu máli það skiptir að hlúa að þeim stað sem við köllum heim. Við val á verðlaunagörðunum er horft til heildarmyndar, umhirðu, gróðurs, frágangs og þess hvernig garðurinn fellur að umhverfi sínu. Það er þó ekki síður metið hversu vel hefur tekist að skapa notalegt, fallegt og persónulegt útisvæði,“ segir í tilkynningu frá umhverfisnefndinni.