Þrír voru fluttir með þyrlu Landhelgisgæslunnar á bráðamóttöku í Reykjavík eftir harðan árekstur jeppa og smárútu á Biskupstungnabraut síðdegis í dag.
Lögreglan á Suðurlandi rannsakar tildrög slyssins en bílarnir komu úr gagnstæðum áttum og lentu beint framan á hvor öðrum.
Mikill viðbúnaður var vegna slyssins en meiðsli fólksins voru ekki jafn alvarleg og talið var í fyrstu. Alls voru þrettán einstaklingar í bílunum tveimur, allt erlendir ferðamenn.
Þeir þrír sem voru mest slasaðir voru fluttir með þyrlu til Reykjavíkur en tíu einstaklingar voru fluttir til aðhlynningar á bráðamóttöku HSU á Selfossi.