Á bilinu 80-90% ferðamanna sem kemur til Íslands heimsækir Suðurland í Íslandsferð sinni en þriðjungur þess hóps dvelur ekki eina nótt innan landshlutans.
Það þýðir að 30% fólks sem heimsækir áfangastaði á Suðurlandi er hér í dagsferð og gistir annars staðar.
Þetta kemur fram í pistli Völu Hauksdóttur, verkefnastjóra áfangastaðaáætlunar hjá Markaðsstofu Suðurlands. Vala spurði nokkra íbúa og frambjóðendur á Suðurlandi um ferðaþjónustuna á svæðinu og má lesa samantekt hennar hér.
Vala segir að þarna komi sannarlega í ljós vannýtt tækifæri.
„Flest þau þróunarverkefni sem Markaðsstofa Suðurlands hefur unnið í samstarfi við sveitarfélögin undanfarin ár miða að því að fá fólk til að gista lengur og versla vörur og þjónustu úr heimabyggð. Sveitarfélög gera mikið gagn fyrir ferðaþjónustuna með því að taka þátt í þessu samstarfi, sem og að eiga góð og regluleg samskipti við ferðaþjónustuna,“ segir Vala.
Hún bætir við að samkvæmt SVÓT greiningu ferðaþjónustunnar á Suðurlandi liggi helst vannýtt tækifæri í matarauð Suðurlands, menningar- og söguferðaþjónustu ásamt hæglætisferðaþjónustu (e. Slow Travel).