Skipulags- og umhverfisnefnd Rangárþings eystra veitti þrenn umhverfisverðlaun á Kjötsúpuhátíðinni um síðustu helgi. Verðlaunin eru veitt þeim íbúum og rekstraraðilum sem leggja sig fram við að halda umhverfinu snyrtilegu og eru öðrum góð fyrirmynd.
Fallegasti garðurinn er í Króktúni 11 á Hvolsvelli þar sem Anna Kristín Helgadóttir og fjölskylda leggja metnað í að halda garðinum fjölbreyttum, blómlegum og snyrtilegum. Auk þess að sinna eigin garði hefur Anna Kristín verið dugleg við að aðstoða nágranna sína við garðvinnu ásamt því að leggja hönd á plóg við umhirðu á opnum svæðum í sveitarfélaginu.
Gistiheimilið Fögruhlíð í Fljótshlíð fékk viðurkenningu sem snyrtilegasta fyrirtæki sveitarfélagsins. Guðlaug Björk Guðlaugsdóttir og Hlynur Snær Theodórsson tóku nýverið við rekstrinum og hafa á stuttum tíma tekið vel til hendinni en í Fögruhlíð byrjuðu afi og amma Hlyns búskap og byggðu upp nýbýli árið 1936. Guðlaug og Hlynur hafa snyrt gróður og bætt ásýnd Fögruhlíðar þannig að vel er tekið á móti þeim sem keyra um Fljótshlíðina.
Uppsalir í Fljótshlíð fengu umhverfisverðlaun fyrir snyrtilegasta býlið. Ábúendur á Uppsölum eru Ísólfur Gylfi Pálmason og Steinunn Ósk Kolbeinsdóttir, Margrét Jóna Ísólfsdóttir og Þórður Freyr Sigurðsson, Kolbeinn Ísólfsson og Berglind Ýr Jónasdóttir og fjölskyldur. Þar er mikill metnaður lagður í að halda umhverfinu frágengnu, ekki síst á og við hlöð eignarinnar. Lögð er áhersla á gott samspil búsetu og skógræktar þar sem sérstaklega er hugað að heilbrigði skógarins með reglulegri grisjun og umhirðu.