Stjórn Afréttarmálafélags Flóa og Skeiða gerði þrenn hjón að heiðursfélögum á aðalfundi félagsins á dögunum. Þetta er í fyrsta sinn sem Afréttarmálafélagið útnefnir heiðursfélaga.
Fyrstu heiðursfélagar Afréttarmálafélags Flóa og Skeiða eru Hafliði S. Sveinsson og Ragnhildur Helgadóttir á Ósabakka, Aðalsteinn Guðmundsson og Ástrún Sólveig Davíðson á Húsatóftum og Ólafur Einarsson og Kristín Stefánsdóttir á Hurðarbaki.
Heiðursfélagar geta orðið þeir aðilar sem hafa lagt sig fram á margvíslegan hátt í þágu félagsins, hafa af hugsjón brunnið fyrir málefnum afréttarins og innt af hendi hin ýmsu verk sem honum fylgja, bæði stór sem smá.
„Þau er mörg handtökin sem fólk hefur unnið í sjálfboðaliðastörfum í gegnum tíðina í kringum göngur og réttir og margvísleg önnur störf tengd félaginu. Öllum þeim aðilum erum við þakklát,“ segir Rúnar Hjálmarsson á Langstöðum, nýr formaður félagsins, en með honum í stjórn eru Steindór Guðmundsson í Hrygg og Jökull Helgason á Ósabakka.