Klukkan 13 í dag barst björgunarsveitum á Hvolsvelli og Hellu hjálparbeiðni frá ferðamönnum sem fest höfðu bíl í Krossá. Þar voru á ferð tveir erlendir ferðamenn með leiðsögumanni.
Björgunarsveitin Dagrennig á Hvolsvelli og Flugbjörgunarsveitin á Hellu fóru inn í Þórsmörk til aðstoðar. Bíll frá ferðaþjónustufyrirtækinu var þá kominn á staðinn, og yfir Krossá. Fólkið var komið upp á þak bílsins, og beið björgunar.
Þau höfðu ekki blotnað við að fara úr bílnum, en þurftu að bíða á þaki bílsins í 2 tíma og var orðið nokkuð kalt, enda talsvert frost í Þórsmörk. Þeim var svo komið í land þegar búið var að tryggja aðstæður og bíllinn var dreginn óskemmdur upp úr ánni.
Eftir að hafa náð í sig hlýju aftur inni í heitum bíl, hélt fólkið för sinni áfram með leiðsögumanninum. Aðgerðum björgunarsveitanna var lokið rétt fyrir 15.