Gasdreifingarspá veðurstofunnar gerir ráð fyrir gasmengun (SO2) frá gosinu á Suðurlandi og Vesturlandi í dag. Búast má áfram, við gosmóðu allvíða á landinu og gæti hún orðið þrálát næstu daga.
Útlit er fyrir hæga breytilega átt þangað til síðdegis á mánudag en þar á eftir er spáð norðan 3-8 m/s sem gæti verið nægur vindur til að hreyfa við móðunni.
Veðurstofan bendir fólki á að fylgjast með á vef Umhverfis- og Orkustofnunar, þar sem gosmóða kemur fram á mælum sem fínt svifryk (PM1) ásamt örlítilli hækkun í brennisteinsdíoxíði (SO2). Frá því í gærkvöldi hafa loftgæði í Reykholti í Biskupstungum til dæmis mælst óholl.
Á vefnum er einnig hægt að finna upplýsingar um viðbrögð við gosmóðu, en meðal annars ættu viðkvæmir einstaklingar, börn og aldraðir að forðast langa dvöl utandyra.