Á sjötta hundrað Þorlákshafnarbúa og íbúa í Ölfusi skrifaði á undirskriftalista þar sem skorað er á Heilbrigðisstofnun Suðurlands að bjóða upp á aukna þjónustu þegar kemur að aðgengi að PCR prófum og hraðprófum á Suðurlandi og opna við allra fyrsta tækifæri fyrir sýnatökur á heilsugæslunni í Þorlákshöfn.
Undirskriftunum var safnað á rúmlega tveimur sólarhringum og í morgun var listinn sendur á forstjóra HSU. Það var Ása Berglind Hjálmarsdóttir, íbúi í Þorlákshöfn og formaður foreldrafélags Grunnskólans í Þorlákshöfn, sem stóð fyrir undirskriftasöfnuninni.
„Nú er fyrirséð að börn þurfa í sýnatökur við minnsta tilefni og smitin í samfélaginu eru í hæstu hæðum. Það er ekki hægt að bjóða íbúum í Þorlákshöfn lengur upp á það að keyra á Selfoss eða til Reykjavíkur til að nýta þessa þjónustu. Það eru fjölmörg dæmi um að sýnatökuferðin á Selfoss hafi tekið þrjár til fjórar klukkustundir, sem er alls ekki boðlegt og sér í lagi þegar börn eru í bílnum, svo ekki sé talað um umhverfislegu sjónarmiðin í þessu samhengi,“ segir Ása Berglind.
„Það eru fordæmi fyrir því að HSU bjóði upp á sýnatökur með aðstoð Securitas á Hvolsvelli og Þorlákshafnarbúar sjá ómögulega afhverju er ekki hægt að bjóða upp á slíkt fyrirkomulag í Þorlákshöfn. Ef heilsugæslustöðin rúmar þetta ekki þá eru húsnæði á lausu sem gætu vel hýst sýnatökur,“ bætir hún við.