Þjótandi ehf átti lægsta tilboðið í endurbætur á Oddavegi á Rangárvöllum, sem vinna á að í sumar.
Tilboð Þjótanda hljóðaði upp á 77,2 milljónir króna og var það eina tilboðið sem var undir áætluðum verktakakostnaði Vegagerðarinnar, sem var 79,3 milljónir króna.
Þrjú önnur sunnlensk verktakafyrirtæki buðu í verkið. Steypudrangur í Vík bauð 80,3 milljónir króna, vörubílstjórafélagið Mjölnir 89,3 milljónir og Suðurtak bauð 97 milljónir króna í verkið.
Um er að ræða endurmótun á 2,8 km kafla á Oddavegi, frá Odda að Ártúnsvegi og á verkinu að vera lokið þann 1. október næstkomandi.