Vegagerðin hefur átt samstarf við Landsvirkjun vegna fyrirhugaðra flutninga á efni og tækjum í tengslum við uppbyggingu vindorkuvers við Vaðöldu. Liður í þeim undirbúningi voru álagsprófanir á brúnni yfir Þjórsá sem fóru fram fyrr í mánuðinum.
Prófanirnar voru gerðar til að staðfesta forsendur og niðurstöður reiknilíkana við mat á burðarþoli brúarinnar og öryggi gagnvart þyngstu fyrirhuguðu flutningunum.
Niðurstöður mælinganna verða notaðar til að ákveða hvort veita megi heimildir til efnisflutninga um brúna með þyngri farm en fordæmi eru fyrir, eða allt að 270 tonna heildarþyngd, án þess að ráðast þurfi í frekari aðgerðir. Þá kemur til greina að styrkja brúna á völdum stöðum, ef niðurstöður álagsprófana benda til þess að brúin hafi ekki þann burð sem þarf.
Tæknimenn frá dönsku verkfræðistofunni Rambøll og mælingamenn frá Verkís, í samstarfi við brúarvinnuflokk Vegagerðarinnar, settu upp mælibúnað á brúna en það var liður í undirbúningi álagsprófananna. Meðal annars voru settir upp hröðunarmælar, streitunemar, hallamælar á undirstöður auk þess sem niðurbeygjur voru mældar með alstöðvum.
Verkefnið var umfangsmikið og stóð undirbúningur yfir í langan tíma. Vegagerðin hefur unnið að undirbúningi mælinganna frá því seint á síðasta ári og hefur fjölmargt starfsfólk komið að þeirri vinnu.
