Þjóðaröryggisráð fundaði um viðbrögð við eldgosi og hópslysum

Þjóðvegur 1 á Breiðamerkursandi. Öræfajökull í baksýn. Ljósmynd © Mats Wibe Lund

Fjallað var um viðbúnað vegna mögulegs eldgoss í Öræfajökli og viðbúnað í dreifbýli vegna almannavarnavár og hópslysa á sjöunda fundi þjóðaröryggisráðs sem haldinn var síðastliðinn mánudag.

Gestir fundarins voru Rögnvaldur Ólafsson, lögreglufulltrúi hjá almannavarnadeild ríkislögreglustjóra, og Jón Svanberg Hjartarson, framkvæmdastjóra Slysavarnafélagsins Landsbjargar, auk annarra fulltrúa frá almannavarnadeild ríkislögreglustjóra, Veðurstofu Íslands og embætti lögreglustjórans á Suðurlandi.

Þjóðaröryggisráð samþykkti að tillögu ríkislögreglustjóra að hefja undirbúning að því að fram fari fagleg rýni á almannavarnavarnakerfinu og hvað megi betur fara til þess að takast á við nýjar áskoranir þ.m.t. að rýna áhættugreiningar og skoða aðferðir sem hafa verið notaðar við áhættugreiningu og gerð viðbragðsáætlana. Jafnframt verði rýnt verklag og viðbúnað innan umdæma. Þá verður málið rætt áfram á næsta fundi ráðsins.