Fjöldi fólks lagði leið sína í Selvoginn síðdegis í dag til þess að upplifa almyrkva á sólu. Sólin lét sjá sig á milli skýjanna á meðan á deildarmyrkvanum stóð en síðan dró þykk ský fyrir sólu.
Það kom þó ekki í veg fyrir að fólk upplifði almyrkvann sem skall á klukkan 17:49 og það var mögnuð stund. Það dimmdi snögglega í tæpa mínútu, náttúran þagnaði, ef frá eru taldar mannverurnar sem skvöldruðu sín á milli í rökkrinu.
„Þetta var stórkostleg upplifun, ótrúlega merkilegt. Það var leiðinlegt að hafa ekki séð neitt þannig séð en þetta var samt vægast sagt upplifun. Ég hefði ekki viljað missa af þessu,“ sagði Hvergerðingurinn Bjarni Rúnar Lárusson í samtali við sunnlenska.is. Hann ákvað í hádeginu í dag að skella sér í Selvoginn. „Það voru gífurleg vonbrigði að sjá ekki til sólar en það var góður andi hjá fólki hér á þessum fallega stað.“
Magnað að finna myrkrið hellast yfir
Blaðamaður rakst líka á Svisslendinginn Claudia Trost sem var að upplifa sinn annan sólmyrkva á ævinni.
„Þetta var stórkostlegt, þó að við hefðum ekki séð kórónu sólarinnar þá var mögnuð upplifun að finna myrkrið hellast yfir. Þetta var sérstök stund, fuglarnir þögnuðu og svo þegar birti til aftur þá létu þeir í sér heyra. Ég get ekki sagt að ég hafi orðið fyrir vonbrigðum þó að það sæist ekki til sólar, þetta var ótrúleg upplifun,“ sagði Trost en þetta var í annað skiptið sem hún upplifði sólmyrkva. „Sá fyrri var í Frakklandi en þar lenti ég í þrumuveðri þannig að það sást ekki heldur til sólar,“ sagði Trost hlæjandi að lokum.
Það var mikil umferð á þessum slóðum í dag og fjöldi fólks var til dæmis við Hlíðarvatn og allt austur til Grindavíkur. Alls hafa 2.236 bílar farið um Suðurstrandarveg í dag, en það er lítið að marka þá tölu þar sem teljari Vegagerðarinnar er vestan við gatnamótin að Selvogi og telur því ekki alla umferðina sem var lá þangað.
