Það var ófögur sjón sem blasti við eigendum gistihúss við Hvolsvöll í gærkvöldi. Ferðamenn höfðu sprautað vatni úr sturtuhaus inn í skápa og út um allt, skítur var á gólfum og blóð í rúmi. Að auki höfðu þeir bleytt klósettpappír og þakið glugga.
Ferðamennirnir, sem eru frá Suður Kóreu, höfðu átt bókaða gistingu í húsinu. Þegar þeir mættu á staðinn sögðu þeir að það væru hár út um allt og vildu afbóka. Eigendurnir gistihússins samþykktu það, þó að þeir vissu að húsnæðið væri hreint. Ferðamennirnir voru þá búnir að fá kóða að lyklaboxi sem er við húsið. Þar sem eigendurnir komust ekki strax á staðinn þá gafst ekki tími til að breyta kóðanum að lyklaboxinu um leið og afbókunin var samþykkt.
„Það var ótrúlega leiðinlegt að sjá frekar nýtt og fallegt hús svona útleikið. Þetta er svo mikil vanvirðing við eigur annarra,“ segir Kolbrún Hauksdóttir, eigandi gistihússins, í samtali við sunnlenska.is.
Aldrei lent í öðru eins
„Fólk er að stunda þetta út um allan heim að afbóka en að mæta samt. Við erum búin að vera vakandi fyrir þessu en svo gerist þetta akkúrat þegar við erum ekki á staðnum,“ segir Kolbrún en þau fréttu að fólkið væri enn í húsinu klukkan níu í gærkvöldi. Þegar þau komu svo á staðinn klukkan tíu voru ferðamennirnir á bak og brott.
„Við erum búin að vera í þessari ferðaþjónustu í einhver tíu ár. Við höfum alveg lent í að fólk gangi illa um en ekki svona rosalega. Að það sé bara viljaverk að taka sturtuhausinn og sprauta inn í skápana og sprauta út um allt. Þarna er alveg stórt sturtugler og þú þarft alveg að hafa fyrir því að tosa sturtuhausinn fram fyrir til að sprauta út um allt.“
Mikið viljaverk
Það var ekki nóg með það að það væri allt á floti í húsinu heldur hafði ferðamönnunum tekið á skömmu tíma að óhreinka allt húsið.
„Við vitum ekki hvers konar skítur var á gólfinu, hvort það var af skóm eða af klósetti eða hvaðan, við gátum ekki alveg greint það. Það var líka búið að bleyta klósettpappír og klína í gluggana og svo var búið að nota rúmin og það var blóð eða túrblóð eða eitthvað í rúminu og plástar og ógeð út um allt. Við vorum þrjú í sirka klukkutíma að þrífa allt en húsið er 22 fermetrar. Þetta er ekki stórt en þetta var svo ógeðslegt. Maður þarf að þrífa svona ógeð almennilega,“ segir Kolbrún.
Margir hættir að leigja Asíubúum
Sem fyrr segir eru ferðamennirnir frá Suður-Kóreu. Kolbrún segir það færast í vöxt að aðilar í ferðaþjónustunni veigri sér við að leigja fólki frá Asíu.
„Sumir eru hreinlega hættir að leigja þeim húsin sín. Asíubúar bera líka minnstu virðinguna fyrir hlutum og er einhvern veginn alveg sama hvernig allt er. Ég mun samt alveg leigja aftur fólki frá Asíu en ég mun ekki aftur afbóka, því að nú fæ ég ekki greitt fyrir gistinguna eða þrifin, því að ég samþykkti afbókunina þar sem við vorum ekki á staðnum.“
„Þó að ég hafi sjálf verið að þrífa þetta og vissi að það væri allt í lagi þá vill maður frekar að kúnninn sé ánægður heldur að ætla að vera í einhverju þrasi við fólk. En maður þarf greinilega að passa sig að vera búinn að skipta um kóða á lyklaboxinu áður en búið er að ganga frá afbókuninni.“
Vill trúa á það besta í fólki
Aðspurð hvort atvikið hafi verið kært til lögreglu svarar Kolbrún því neitandi. „Lögreglan gerir ekkert í svona. Við erum búin að hafa samband við Booking.com og þeir eru að vinna í þessu, við náttúrulega samþykktum endurgreiðslu því að við bjuggumst ekki við því að fólkið væri komið inn í húsið og búið að vera þar. Það kom bara í ljós þegar aðrir gestir ætluðu að leigja húsið, að það var fólk í húsinu.“
„Maður vill trúa á það besta í fólki. Maður er ekki að búast við að fólk sé að fara að skemma eigur manns,“ segir Kolbrún að lokum.