Húsnæði verslunarinnar Sportbæjar á Selfossi hefur verið selt. Verslunin mun hætta rekstri í júní og lýkur þar með áratuga sögu þessarar rómuðu verslunar á Selfossi.
„Þetta datt svona upp í hendurnar á okkur í desember. Þá var aðili sem vildi kaupa húsið. Og ég er orðin það fullorðin að ég vildi fara að hætta að vinna. Það er heldur ekki auðvelt að reka svona í fjarvinnu eins og ég hef þó gert í öll þessi ár,“ segir Bára Magnúsdóttir, eigandi Sportbæjar, í samtali við sunnlenska.is.
Breyttir verslunarhættir hafa áhrif
Bára, sem er komin á eftirlaunaaldur, keypti Sportbæ af Ingvari Jónsssyni árið 2005. Þá átti hún einnig verslunina Axel Ó í Vestmannaeyjum, þar sem hún er búsett, en henni var lokað í ágúst 2023. Bára hefur rekið Sportbæ með syni sínum, Magnúsi Steindórssyni.
„Verslunarhættir hafa breyst töluvert. Þegar tilboðið kom í húsið þá var það fínn tímapunktur til að sleppa takinu. Ég ákvað gera þetta eins og ég gerði með Axel Ó í Eyjum, ég bara hætti.“
„Þetta er ekkert alveg sársaukalaust, þetta er flott búð en það hefur töluvert breyst. Fólk er rosalega mikið að versla á netinu og við keppum ekkert við þetta Boozt og þannig vefverslanir. Ég held að svona einyrkjar í verslun séu svolítið að detta út. Þetta er allt að færast á færri hendur,“ segir Bára.
Fyrir 0-100 ára
Bára segir að hún hafi alltaf verið ofboðslega heppin með starfsfólk enda hefur verslunin á Selfossi verið annáluð fyrir glaðlegt og brosmilt starfsfólk. Verslunin hefur átt sinn fasta kúnnahóp í gegnum árin og koma margir langa leið að til versla í Sportbæ.
„Það er fullt af fólki sem ég veit um sem keyrir úr bænum, gamlir Vestmannaeyingar. Það gerir sér sér ferð á Selfoss því að í Sportbæ færðu allt frá núll og upp í hundrað ára. Þú getur verslað á alla fjölskylduna í einni ferð.“
Þakklát fyrir tryggan kúnnahóp
Verslunin verður opin fram í júní og hvetur Bára fólk til að nýta gjafabréf og innleggsnótur áður en verslunin hættir. „Það er hellingur til ennþá en 30. júní þarf ég að afhenda húsnæðið. Það er ekki allt á útsölu en það er hægt að gera flott kaup og við eigum margar fallegar vörur.“
„Við viðskiptavini Sportbæ vil ég segja bestu þakkir fyrir hvað við höfum átt tryggan kúnnahóp,“ segir Bára að lokum.
Ætlar ekki að rífa húsið
Sunnlenska.is sló á þráðinn til Bent Larsen sem keypti húsið. Hann vill taka það skýrt fram að það stendur ekki til að rífa húsið. „Ég keypti þessa eign síðustu áramót en Bára var búin að taka ákvörðun um að loka. Ég er ekki að segja henni upp leigunni eða neitt þess háttar. Það sem stendur til í framhaldinu er að gera endurbætur á húsinu og leigja það út. Það eru nokkrir leiguaðilar í samningaviðræðum við mig. Ég ætla ekkert að rífa húsið og geri ráð fyrir að nýr leigutaki við húsnæðinu í sumar eða haust þegar búið er að gera endurbætur á húsinu,“ segir Bent sem hvetur fólk að lokum til að versla í heimabyggð.