Trjám var stolið úr Hellisskógi á Selfossi nú um helgina. Þetta er ekki í fyrsta sinn sem trjám er stolið úr trjásöfnun í skóginum. Trjástuldur er vandamál víða, bæði innanbæjar og á skógræktarsvæðum um allt land.
„Að þessu sinni var stolið Virginíuhegg, garðahlyn og hrossakastaníu. Trén voru rifin upp og fjarlægð. Þeim var plantað þarna fyrir þremur árum, voru komin með góða rót og uxu vel,“ segir Örn Óskarsson, formaður Skógræktarfélags Selfoss, í samtali við sunnlenska.is.
Örn gerir ráð fyrir því að stuldurinn hafi átt sér stað um eða rétt fyrir helgi.
„Mín skoðun er einföld. Þetta er ólíðandi og þarf að fá samstöðu með íbúum um að uppræta þetta viðhorf að hægt sé að vaða um og stela. Þetta er ekki í fyrsta skipti sem stolið er úr Hellisskógi. Einu sinni var stuldur upplýstur. Þá var um að ræða einstakling á Selfossi sem fyllti lóðina sína af trjám úr Hellisskógi.“
Vandamál á landsvísu
Fyrr í sumar voru tré rifin úr beði við Sundhöll Selfoss og í miðbænum. Örn segir að ekki sé ósennilegt að trjánum hafi verið plantað í garð eða við sumarbústað.
„Því miður eru sumir svo ómerkilegir að þeim finnst ekkert að því að stela sér trjám frá öðrum og planta í garðinn sinn. Trjástuldur er vandamál á skógræktarsvæðum víðar en hér á Selfossi og í raun er þetta vandamál á landsvísu. Ef einhver hefur upplýsingar um afdrif trjánna sem var stolið úr Hellisskógi þá endilega látið vita.“
„Ég hvet fólk til að vera á varðbergi og passa upp á sínar plöntur í görðum eða sumarhúsalöndum því trjáþjófar svífast einskis og geta þess vega farið inn á einkalóðir,“ segir Örn ennfremur.
