Fljótlega eftir að appelsínugular veðurviðvaranir tóku gildi klukkan 10 í morgun bárust fyrstu útköll björgunarsveita vegna veðursins.
Hjálparsveit skáta í Hveragerði var fyrst út úr húsi til þess að fergja þakplötur sem fokið höfðu af nýbyggingu nálægt Hveragerði.
Klukkan tólf höfðu síðan Mannbjörg í Þorlákshöfn og Flugbjörgunarsveitin á Hellu verið kallaðar út, til þess að takast á við fok á þakplötum eða klæðningum.
Í tilkynningu frá Landsbjörgu segir að gera megi ráð fyrir að víða verði varasamt ferðaveður og að tryggja þurfi lausamuni til koma í veg fyrir foktjón.
Þá er því beint til foreldra og forráðamanna grunnskólabarna að þau gæti þess að sækja börnin sín að loknum skóladegi en láti þau ekki ganga ein heim.