Tekist á um gjaldskrárhækkun hitaveitunnar

Gjaldskrá Selfossveitna á heitu vatni mun hækka um 5% um áramótin en fulltrúar minnihlutans í framkvæmda- og veitustjórn Árborgar mótmæltu hækkuninni á síðasta fundi.

Á fundi framkvæmda og veitustjórnar þann 9. október sl. var ákveðið að hækka gjaldskrá Selfossveitna á heitu vatni um 3,3%. Á síðasta fundi nefndarinnar, þann 13. nóvember, var síðan lögð fram tillaga um að hækkunin yrði 5%.

Eggert Valur Guðmundsson, nefndarmaður S- lista og Andrés Rúnar Ingason, nefndarmaður V- lista, mótmæltu harðlega á fundinum að hækkunin yrði 5% og segja þeir þá hækkun vera verulega umfram það sem stjórn framkvæmda- og veitustjórnar hafði áður samþykkt. Hækkunin myndi hafa í för með sér rúma 40% hækkun á heitu vatni á kjörtímabilinu.

Að mati Eggerts og Andrésar er þessi aukna hækkun ekkert annað en illa dulin skattahækkun á íbúa Sveitarfélagsins Árborgar, „dulbúin sem hækkun gjaldskrár á heitu vatni.“

„Ef þessi tillaga verður samþykkt hefur verð á heitu vatni í sveitarfélaginu hækkað um rúm 43% á kjörtímabilinu sem er langt umfram launaþróun helstu launþegahópa. Ákvörðun um slíka stórhækkun á lífsnauðsynjunum á öll heimili í sveitarfélaginu er tekin án tillits til tekna og stöðu,“ segir í bókun Eggerts og Andrésar og því mótmæla þeir þessari auknu hækkun eindregið.

Fulltrúar D-listans, þeir Gunnar Egilsson, Ingvi Rafn Sigurðsson og Tómas Ellert Tómasson svöruðu með bókun þar sem fram kemur að breyting á vaktafyrirkomulagi og hækkun aðfanga umfram verðbólgu sem ekki lágu fyrir á fundi þann 9. október skýri þessa breytingu á því sem framkvæmda- og veitustjórn hafði áður samþykkt.

„Sem dæmi þá hefur orðið umtalsverð hækkun á rafmagni. Einnig voru endurnýjanir á mælum færðar úr fjárfestingum í rekstur í bókhaldi sviðsins. Breytingar á forsendum á fyrri samþykkt úr 3,3% í 5,0% , þegar fyrri gjaldskrárbreyting var ákveðin, þýðir um 150 kr. hækkun á meðalheimili á mánuði í sveitarfélaginu. Það er skylda okkar sem kjörinna fulltrúa að reka veiturnar ekki með tapi,“ segir í bókun fulltrúa D-listans sem samþykktu síðan hækkunina en Eggert og Andrés greiddu atkvæði á móti tillögunni.