Sögulegur viðburður verður næstkomandi föstudag þegar þrjár Flóka viskítunnur verða opnaðar eftir fimm ára þroskun í einstöku umhverfi Hellanna við Hellu.
Geymsluaðstæður í hellunum eru einstakar; þar ríkir náttúrulegur stöðugleiki í hitastigi og rakastigi árið um kring. Það eru Eimverk Distillery og Caves of Hella sem standa að þessari sögulegu íslensku viskígerð.
„Við erum rétt búin að kíkja í eina tunnu og í ljós kom að svokallaður Angel’s Share, það magn áfengis sem gufar upp úr tunnunni við þroskun, er óvenju mikið. Spurning hvort draugar í hellunum hafi fengið sér smá dreitil,“ segir Ólöf Þórhallsdóttir, hjá Caves of Hella.
Einstök skilyrði og „hlutur englanna“
Samstarfsverkefnið hófst fyrir hálfum áratug með það að markmiði að kanna áhrif hinna fornu sandsteinshella á þroskun Flóka viskís. Þrátt fyrir svala og kyrrð hefur svokallaður Angel’s Share verið óvenju hár. Niðurstaðan er viskí með fágætan styrk og dýpt en magn alkóhóls í viskíinua er 53,5%.
Tugþúsundir gesta hafa virt tunnurnar fyrir sér á þroskunartímanum, lært að viskíið sé unnið úr íslensku byggi sem ræktað er í næsta nágrenni hellanna og nefnt eftir Hrafna-Flóka.
„Þetta verkefni tengir okkur órjúfanlega við upprunann og íslenska menningarsögu,“ segir Haraldur Þorkelsson, framkvæmdastjóri Eimverks Distillery. „Á sama tíma og við drögum þessa dýrmætu dropa úr djúpum hellanna, horfum við fram á veginn en í Bjálmholti rís nú nýtt eimingarhús Eimverks, sem verður glæsilegur áningarstaður fyrir gesti, en fyrirhuguð opnun þess er sumarið 2027“.
Átöppunin á föstudaginn fer fram með hátíðlegum hætti beint úr hellunum. Þetta takmarkaða upplag af Flóka er átöppun sem safnarar og unnendur hágæða viskí hafa beðið eftir með eftirvæntingu.