Harður árekstur tveggja bifreiða varð á sjöunda tímanum á föstudagskvöld á Biskupstungnabraut skammt sunnan við Reykholt.
Þar hafði fólksbifreið verið snúið við á þjóðveginum við afleggjara að sveitabæ og í veg fyrir pallbifreið sem hafði verið ekið á eftir fólksbifreiðinni.
Farþegi í fólksbifreiðinni var fluttur talsvert slasaður með sjúkrabifreið á slysadeild Landspítala. Fimm aðrir voru fluttir á heilsugæslustöð með minniháttar áverka.
Auk lögreglu og sjúkraflutningamanna voru mættir á staðinn björgunarsveitarmenn frá Flúðum sem eru með vettvangshjálparhóp sem er kallaður til þegar alvarleg slys og bráðaveikindi verða í uppsveitum Árnessýslu.