Talið að bíll hafi farið í Ölfusá

Við Ölfusá í kvöld. sunnlenska.is/Guðmundur Karl

Umfangsmikil leit stendur nú yfir á og við Ölfusá. Talið er að bifreið hafi farið í ánna við Básinn fyrir ofan Selfosskirkju.

Stór hópur viðbragðsaðila hefur verið kallaður út; björgunarsveitir, slökkvilið, lögregla og sjúkraflutningamenn. Leitað er frá Ölfusárbrú og niður eftir ánni. Björgunarsveitarbátar eru á ánni og meðal annars er leitað með hitamyndavélum.

Þyrla Landhelgisgæslunnar er komin á leitarsvæðið. Um borð í henni er slökkviliðsmaður frá Brunavörnum Árnessýslu með hitamyndavél. Björgunarsveitarmenn leita á landi frá Selfossi og niður að Kaldaðarnesi.

UPPFÆRT KL. 23:35:  Tilkynning barst Neyðarlínu um kl. 22:00 í kvöld þess efnis að ungmenni hefði séð bifreið ekið í ána. För á vettvangi og brak í ánni styðja þann framburð. Lögregla telur sig hafa sterkan grun um hver var þarna á ferð og eru aðstandendur viðkomandi í samráði við lögreglu um málið.