Krabbameinsfélag Árnessýslu færði krabbameinsdeild Heilbrigðisstofnunar Suðurlands fallega bjöllu að gjöf á dögunum og mun hún fá sérstakan sess á göngudeild HSU.
Bjallan er hugsuð fyrir einstaklinga sem lokið hafa krabbameinsmeðferð. Að síðustu meðferð lokinni gefst einstaklingum kostur á að hringja bjöllunni á göngudeildinni með starfsfólki sem hefur fylgt því í gegnum meðferð, oft í nokkra mánuði – stundum ár.
Það að hringja bjöllu í lok krabbameinsmeðferðar markar lok ákveðins kafla og upphaf þess næsta. Þetta táknræna augnablik veitir oft gríðarlega andlegan styrk og gefur skjólstæðingum tækifæri að deila augnablikinu með fjölskyldu og starfsfólki sem fylgt hefur einstaklingnum í gegnum sína vegferð.
Í tilkynningu frá Krabbameinsfélag Árnessýslu segir að þar á bæ voni fólk að bjallan verði mörgum áminning um seiglu, hugrekki og von – og gefur þeim sem ljúka meðferð tækifæri til að fagna þessum mikilvægu tímamótum.