Taka efni úr tíu námum í Bláskógabyggð

Sveitarstjórn Bláskógabyggðar hefur gefið Vegagerðinni leyfi til að taka efni úr tíu námum sveitarfélagsins, eða alls um 42 þúsund rúmmetra til lagfæringa á Kjalvegi í sumar.

„Í venjulegu árferði heflum við bara slóðann sem þarna er. Við höfum hins vegar tekið kafla og kafla í nokkrum áföngum frá slitlagsenda sunnan við Grjótá og norður að Hvítá,“ segir Svanur Bjarnason hjá Vegagerðinni um framkvæmdirnar.

Búið er að lyfta veginum örlítið upp úr landi án þess að lagfæra plan eða hæðarlegu að nokkru marki að sögn Svans. Hann segir að með því móti haldist ástand vegarins betra í lengri tíma eftir heflun, þar sem hann er þá ekki lengur niðurgrafinn eins og slóðinn sem fyrir er. Þannig nær vatn því að renna af veginum en ekki eftir honum eins og í lækjarfarvegi.

Svanur segir framkvæmdirnar umtalsverðar. „Já, það stendur til að fara í heldur lengri kafla en venjulega eða allt að tíu kílómetra leið frá Hvítá inn að Árbúðum. Áætlað er að fara í þessar framkvæmdir í sumar þegar frost leysir. Það verða starfsmenn og tæki Vegagerðarinnar ásamt aðkeyptri vinnu frá verktökum sem vinna þetta verk,“ segir Svanur ennfremur.