Stjórn Samtaka sunnlenskra sveitarfélaga hefur úthlutað verkefnastyrkjum úr Uppbyggingarsjóði Suðurlands en um er að ræða fyrri úthlutun ársins. Umsóknir voru samtals 120 en samþykkt var að veita 62 verkefnum styrk.
Að þessu sinni var 37,7 milljónum króna úthlutað; 17,3 milljónum í flokk atvinnu og nýsköpunar og 20,4 milljónum í flokk menningar.
Hæsta styrkinn í flokki menningarverkefna, eina milljón króna, hlaut Benedikt Kristjánsson fyrir Sumartónleika í Skálholtskirkju. Sumartónleikarnir varpa ljósi á lítt þekkta barrokksnillinga 17. aldar, og sýnir framtíð íslenskrar tónsköpunar. Barna og fjölskyldutónleikar verða með frumlegu sniði og yndislegt umhverfi Skálholts bíður alla velkomna að kostnaðarlausu.
Í flokki atvinnu og nýsköpunar hlaut Fjölskyldubúið ehf. tveggja milljón króna styrk fyrir verkefnið Hreppamjólk með aukinn melatónínstyrk. Markmið verkefnisins er að kanna fýsileika þess að þróa Hreppamjólk með aukinn, skilgreindan styrk á melatóníni. Ef niðurstöður gefa tilefni til yrði næsta skref að þróa Hreppamjólk með aukinn melatónínstyrk og markaðsetja sem heilsueflandi vöru. Í þessu hálfsárs verkefni á að setja upp mæliaðferð hjá Matís til að mæla styrk melatóníns í kúamjólk í einingunni pg/mL. Það á að kanna einstaklingsbreytileika á milli kúa varðandi framleiðslu á melatóníni við ákveðin birtuskilyrði.
Þá hlaut Sighvatur Lárusson tveggja milljón króna styrk fyrir verkefnið Recoma Packwall byggingplötur. RECOMA gefur sorpi nýtt líf og umbreytir því í endingargóðar byggingarplötur sem eru án aukaefna og geta komið í staðin fyrir hefðbundnar byggingaplötur.
Lista yfir öll verkefni sem hlutu styrk má sjá hér.