Tæplega 600 milljón króna halli hjá Árborg

Ráðhús Árborgar á Selfossi. sunnlenska.is/Guðmundur Karl

Halli á samstæðureikningi Sveitarfélagsins Árborgar árið 2020 er alls 578 milljónir króna. Í fréttatilkynningu frá Árborg segir að hægt er að rekja að lágmarki 460 milljónir króna til heimsfaraldurs Covid-19 og 200 milljónir króna til óvenjulegrar hækkunar í fjármagnsliðum.

„Án ofangreindra áfalla hefði orðið afgangur af rekstri samstæðu Árborgar upp á um 100 milljónir króna. Niðurstaða ársreiknings 2020 getur talist ásættanleg í ljósi þess heimsfaraldurs sem einkenndi liðið ár, sér í lagi þegar við bætist gríðarlegrar fjölgun íbúa og tilheyrandi uppbyggingarferli á innviðum og fjölskylduþjónustu,“ segir í tilkynningunni.

Rekstrarniðurstaða A- og B- hluta er neikvæð um 578,5 milljónir króna sem er 396 milljónum króna lakari niðurstaða en áætlun gerði ráð fyrir. Heildartekjur sveitarfélagsins eru rúmir 11 milljarðar króna og heildarútgjöld með afskriftum en án fjármagnsliða rúmlega 10,7 milljarðar króna. Að öllu samanlögðu nema heildarútgjöld með afskriftum án fjármagnsliða 96,8% af heildartekjum A- og B-hluta ársreiknings.

„Markmið Sveitarfélagsins Árborgar í viðbrögðum við Covid-19 heimsfaraldrinum hefur verið að styðja við og styrkja efnahag, samfélag og þjónustu í sveitarfélaginu. Sveitarfélagið hefur axlað byrðar með ríkinu og má þar benda á gríðarlegan niðurskurð Jöfnunarsjóðsframlaga. Sveitarfélagið hefur einnig tekið á sig tekjulækkun og kostnaðarauka vegna sérstakra eigin aðgerða og utanaðkomandi aðstæðna. Sveitarfélagið Árborg hefur tekist á við félagsþjónustuverkefni Covid-19 af sérstökum krafti og starfar m.a. mjög náið með ráðuneytum að framfaraverkefnum á þessu sviði,“ segir ennfremur í tilkynningunni.

Greinargerð með ársreikningi 2020

Fréttatilkynning Árborg – ársreikningur 2020