Colas Ísland ehf í Hafnarfirði átti lægsta tilboðið í endurbætur á stuttum kafla á Eyrarbakkavegi sem vinna á að í sumar.
Tilboð Colas Ísland hljóðaði upp á rúmar 104,6 milljónir króna og var 98,4% af áætluðum verktakakostnaði Vegagerðarinnar, sem er tæpar 106,4 milljónir króna.
Þrjú önnur tilboð bárust í verkið. Loftorka Reykjavík ehf í Garðabæ bauð 107,7 milljónir króna, Óskatak ehf í Kópavogi 112,8 milljónir og Malbiksstöðin ehf í Mosfellsbæ 148,3 milljónir króna.
Um er að ræða styrkingu og malbikun á 1,7 km kafla á Eyrarbakkavegi frá Stekkum að Tjarnarbyggð. Verkið felst í því að fræsa upp núverandi slitlag og breikka veginn lítilsháttar áður en lagt verður yfir 15 cm þykkt burðarlag og malbik. Hvinrendur verða svo fræstar í miðlínu vegarins.