„Svo gefum við björgunarsveitinni allan peninginn“

Krakkarnir í 3. bekk voru mjög ánægð með afrakstur Góðgerðardaganna og dugleg að selja sínar vörur. sunnlenska.is/Guðmundur Karl

Góðgerðardögum í Sunnulækjarskóla á Selfossi lýkur í dag með glæsilegum jólamarkaði í íþróttahúsinu Baulu.

„Við erum búin að vera að föndra allskonar jólaskraut og jóladót sem er hægt að kaupa og svo gefum við björgunarsveitinni allan peninginn,“ sagði áhugasamur sölumaður í 2. bekk í samtali við sunnlenska.is í morgun.

Vöruúrvalið á markaðnum er ótrúlega fjölbreytt og glæsilegt en nemendurnir selja þar ýmsan varning sem þeir hafa verið að búa til undanfarna daga. Í Fjallasal er svo kaffihús með lifandi tónlist og jólastemmningu þar sem hægt er að tylla sér niður og kaupa veitingar.

Í ár rennur allur ágóði af góðgerðardögunum til Björgunarfélags Árborgar og þeir sem hafa áhuga geta enn litið við í skólanum en markaðurinn er opinn til 12:30.

sunnlenska.is/Guðmundur Karl