Lögreglan á Suðurlandi kærði sjö ökumenn í liðinni viku fyrir að aka bifreið próflausir. Einn þeirra reyndist ölvaður að auki en sá var á ferð um miðjan dag í Hveragerði.
Tveir ökumannanna voru á ferðinni í bílum sínum þrátt fyrir að hafa aldrei staðist bílpróf og tveir þeirra voru með útrunnin ökuskírteini.
Einn ökumaður til viðbótar var stöðvaður vegna ölvunaraksturs á Hellu á laugardagskvöld og einn var sviptur á staðnum eftir að hafa verið mældur á 68 km/klst hraða á Stokkseyri þar sem hámarkshraðinn var 30 km/klst. Honum hefur verið boðið að ljúka máli sínu með greiðslu 45 þúsund króna sektar og sviptingu ökuréttar í þrjá mánuði.
Að auki voru þrettán ökumenn kærðir fyrir hraðakstur í liðinni viku og númer voru tekin af fimm ökutækjum sem reyndust ótryggð í umferðinni.
Þetta kemur fram í dagbók lögreglunnar á Suðurlandi.