Sverrir Haukur Grönli hefur verið ráðinn varaslökkviliðsstjóri hjá Brunavörnum Árnessýslu. Hann tekur við starfinu af Pétri Péturssyni sem ráðinn var slökkviliðsstjóri á dögunum.
Stjórn og slökkviliðsstjóri Brunavarna Árnessýslu tóku ákvörðun um ráðninguna en um stöðuna sóttu átta einstaklingar.
Úr hópi hæfra umsækjenda var ákveðið að ganga til viðræðna við Sverri Hauk og hefur hann ákveðið að taka starfinu. Sverrir hefur starfað sem atvinnuslökkviliðsmaður síðastliðin sextán ár. Hann starfaði fyrstu tíu árin hjá Slökkviliði höfuðborgarsvæðisins en síðastliðin sex ár hefur hann starfað hjá slökkviliðinu í Bergen í Noregi.
Sverrir Haukur hlaut menntun atvinnuslökkviliðsmanna hjá Redningsverket í Svíþjóð og hefur lokið stjórnunarnámi fyrir stjórnendur slökkviliða í Noregi er veitir honum heimild til að starfa sem slökkviliðsstjóri þar í landi samkvæmt norskum lögum. Sverrir Haukur hefur aflað sér sérmenntunar í Noregi í slökkvifræðum er tengjast almennum slökkvifræðum, fjallabjörgun, notkun körfubifreiða við slökkvistörf, sporvagnaelda, skips- og gróðurelda auk kennslufræða.
Hann hefur undanfarið séð um skipulagningu og kennslu atvinnuslökkviliðsnáms sem og hlutastarfandi náms slökkviliðsmanna á Bergen svæðinu og nágreni en á því svæði búa yfir fimm hundruð þúsund manns.
Sverrir Haukur mun hefja störf hjá Brunavörnum Árnessýslu innan tíðar en hann er búsettur ásamt fjölskyldu sinni í Bergen. Þau undirbúa nú flutning fjölskyldunnar til Árnessýslu.