Bæjarráð Árborgar og sveitarstjórn Bláskógabyggðar undrast að Vegagerðin hafi ekki haft samráð við sveitarfélög á Suðurlandi um fyrirhugaða breytingu á rekstri strætó á Suðurlandi.
Vegagerðin tilkynnti sveitarfélögunum á dögunum að rekstri annarrar aksturleiðar á leið 72 og 73, Selfoss-Reykholt, verði hætt.
Sveitarstjórn Bláskógabyggðar telur að mikilvægt sé að halda óbreyttri akstursáætlun, enda kom akstur strætó á umræddri leið í stað skólaaksturs Fjölbrautaskóla Suðurlands á sínum tíma og óásættanlegt sé að fella aksturinn niður.
Bæjarráð Árborgar tók undir bókun Bláskógabyggðar á síðasta fundi sínum og lýsti yfir vonbrigðum yfir því að verið sé að fækka og fella út akstursleiðir almenningssamgangna á Suðurlandi. Bæjarráð Árborgar segir mikilvægt að halda stöðugleika í akstursleiðum og tíðni ferða til að auka nýtingu strætó en eðlilegt sé að aðlaga tímatöflur og leiðarkerfi til samræmis við reynslu og ábendingar notenda.