Sveitarstjórn Grímsnes- og Grafningshrepps samþykkti á fundi sínum í dag að kaupa þinghúsið Gömlu Borg. Kaupverðið er 86 milljónir króna.
Gamla-Borg var reist árið 1929 af Ungmennafélaginu Hvöt í Grímsneshreppi eftir teikningum Þorleifs Eyjólfssonar og er húsið talið einstakt sinnar tegundar á landinu. Upphaflega var það byggt sem þinghús sveitarinnar og skóli, en sú starfsemi stóð aðeins yfir í skamman tíma.
Í tilkynningu frá sveitarfélaginu segir að með kaupunum sé stigið mikilvægt skref í varðveislu menningararfs sveitarinnar, enda hefur Gamla-Borg gegnt lykilhlutverki í samfélaginu í nær heila öld. Með kaupum á húsinu hyggst sveitarfélagið tryggja varðveislu þess og nýta það áfram í þágu samfélagsins, fyrir minni menningartengda viðburði og aðstöðu sem nýtist eldri borgurum sveitarfélagsins til samveru og félagsstarfs.
Á árunum 1930–1960 var Gamla Borg eitt helsta samkomuhús sveitarinnar, þar var rekin verslun og kaupfélagsstarfsemi auk þess sem þar var póstafgreiðsla og fundarstaður hreppsnefndar.
Árið 1966 tók nýtt og stærra samkomuhús við samkomuhaldi sveitarinnar og Gömlu Borg var lítið sinnt næstu áratugi. Um miðjan tíunda áratuginn var húsið orðið illa farið og árið 1995 voru viðraðar hugmyndir um að rífa það. Þá gripu framsýnar konur í hreppnum, meðal annars Lísa Thomsen á Búrfelli, inn í og hófu aðgerðir til að bjarga því.
Í kjölfarið var ráðist í metnaðarfulla endurgerð þar sem lögð var áhersla á að endurheimta upprunalegt útlit hússins bæði að utan og innan. Árið 1999 var Gamla-Borg endurvígð og varð á ný vettvangur mannamóta í sveitarfélaginu.