Brotist var inn í Almars bakarí í Hveragerði í nótt. Þjófurinn hafði á brott með sér marsipanstykki, franska vöfflu, kókoskúlu og Red Bull – allt það heitasta úr orkupakkanum. Að auki stal hann litlum hníf.
„Innbrotið var um eittleytið í nótt í nótt. Fyrsti maður hjá okkur kemur klukkan tvö og sér þá og finnur að það er ískalt inni í bakaríinu,“ segir Lóa Ingibergsdóttir, eigandi Almars bakarí, í samtali við sunnlenska.is
Fyrsta innbrotið á 17 árum
Lóa segir að þjófurinn, sem er ungur að árum, hafi fyrst farið inn í Shellskálann hjá Villa þar sem hann hafi náð einhverju líka. Lögreglan hefur handsamað þjófinn.
„Okkur brá náttúrulega mjög mikið þegar við fengum símtalið í nótt og þetta er í fyrsta sinn sem við lendum í því að það sé brotist inn til okkar, á 17. afmælisárinu okkar. Annars erum við bara góð. Við erum mjög ánægð með að ekki varð meiri skaði og hann skemmdi ekki meira en þessa rúðu.“
Þegar sunnlenska.is sló á þráðinn til Lóu um kvöldmatarleyti var brjálað að gera í Almars bakarí í Hveragerði og opið lengur en venjulega lokar bakaríið klukkan sex. „Hér er allt fullt af svöngum túristum og iðnaðarmönnum sem komast hvorki lönd né strönd vegna vegalokanna,“ segir Lóa sem á von á því að standa vaktina eitthvað lengur.