Sunnlenska.is, fréttavefur Sunnlendinga, fagnar fjögurra ára afmæli í dag en vefurinn fór í loftið þann 8. apríl 2010.
Vefurinn fékk frábærar viðtökur strax í upphafi og er umferð um hann ennþá að aukast jafnt og þétt. Raunar var síðasta vika metvika í aðsókn á vefinn og í dag er svo komið að hann er mest lesni héraðsfréttamiðillinn á Suðurlandi.
Vefurinn er heimsóttur úr öllum heimshornum og á fjölmarga fasta lesendur erlendis t.d. um alla Skandinavíu, í Bandaríkjunum og á Spáni. Þá eru fjölmargar reglulegar heimsóknir frá fjarlægari stöðum eins og Kólumbíu, Tælandi og Sameinuðu arabísku furstadæmunum.
Allt frá því vefurinn fór í loftið hefur ritstjórn hans kappkostað að flytja fréttir af öllu Suðurlandi auk þess að fjalla um menningarmál og íþróttir í héraðinu.
Í tilefni afmælisins ætlum við að bjóða fjórum heppnum lesendum í Selfossbíó og má kynna sér það boð nánar á Facebooksíðu sunnlenska.is.
Ritstjórn sunnlenska.is þakkar lesendum sínum fyrir skemmtilega og jákvæða samveru á liðnum árum og horfir björtum augum fram á veginn.