Sunnlenska.is, fréttavefur Sunnlendinga, fagnar tíu ára afmæli í dag en vefurinn fór í loftið þann 8. apríl 2010.
Vefurinn fékk frábærar viðtökur strax í upphafi og hefur umferðin um hann aukist ár frá ári. Í dag er svo komið að sunnlenska.is er mest lesni héraðsfréttamiðillinn á Suðurlandi.
Vefurinn er heimsóttur úr öllum heimshornum og á fjölmarga fasta lesendur erlendis. Sé litið til síðustu vikna í samkomubanni hefur innanlandsumferð hins vegar aukist mjög mikið.
Allt frá því vefurinn fór í loftið hefur ritstjórn hans kappkostað að flytja fréttir af öllu Suðurlandi auk þess að fjalla um menningarmál og íþróttir í héraðinu.
Ritstjórn sunnlenska.is þakkar lesendum sínum fyrir skemmtilega og jákvæða samveru á liðnum árum og horfir björtum augum fram á veginn.
Í tilefni dagsins bregðum við á leik með vinum okkar á Facebook.