Í dag, 19. júní, eru 134 ár síðan Lárus Rist, sundkennari, fæddist en hann kom til Hveragerðis frá Akureyri árið 1936. Óttar Guðmundsson afabarn Lárusar kom í tilefni afmælisins og færði Sundlauginni Laugaskarði gjöf, höggmynd af Lárusi Rist sem Ríkharður Jónsson hannaði.
Jóhanna M. Hjartardóttir, menningar- og frístundafulltrúi, tók við gjöfinni en faðir hennar Hjörtur S. Jóhannsson tók við forstöðu sundlaugarinnar þegar Lárus lét af störfum árið 1946 og starfaði til dauðadags árið 1985.
Lárus J. Rist gekk í Ungmennafélag Ölfusinga og varð fljótlega mikilvirkur í félagsstarfinu. Hann var stórhuga og setti sér það markmið að í Hveragerði skyldi byggð vegleg sundlaug, stærsta sundlaug landsins.
Nú eru 75 ár síðan vatni var hleypt í sundlaugina í fyrsta sinn. Þá var sundlaugin 12 x 25 m. Menn héldu áfram uppbyggingu og árið 1945 var komin 50 m löng sundlaug með steyptum botni og var þá lengsta sundlaug landsins.
Strax og vatn var komið í laugina hófst sundkennslan og var Lárus aðalsundkennarinn næstu árin. Um 500 börn og unglingar voru árlega við nám og æfingar í sundlauginni. Langflest voru þau úr Hveragerði og nærliggjandi sveitum en fyrstu árin komu einnig börn til sundnáms frá Suðurnesjum, víðsvegar af Suðurlandi og austan úr Skaftafellssýslu.