Stórt sumarhús í landi Miðfells við Þingvallavatn eyðilagðist í eldsvoða í gærkvöldi. Neyðarlínan fékk tilkynningu um eldinn kl. 21:20 en samkvæmt fyrstu tilkynningu fauk kolagrill á hliðina í vindhviðu og kveikti eldinn sem magnaðist hratt.
Fólkið sem var í húsinu slapp út úr því og varð ekki meint af. Húsið var alelda þegar slökkviliðsmenn frá Brunavörnum Árnessýslu á Laugarvatni og Selfossi komu á vettvang.
Slökkvistarfi lauk uppúr klukkan 00:30 í nótt en það tók talsverðan tíma þar sem afla þurfti vatns með tankbílum og keyra á staðinn, en það gekk vel fyrir sig að sögn Lárusar Kristins Guðmundssonar, setts slökkviliðsstjóra. Þá fór mikil vinna hjá slökkviliðsmönnnum að verja gróður á svæðinu en þarna er þétt sumarhúsabyggð og því mikið í húfi að eldurinn breiddist ekki út.
Húsið er ónýtt eftir brunann en lögreglan á Suðurlandi rannsakar eldsupptökin.
