Liðsmenn Brunavarna Árnessýslu frá Laugarvatni, Reykholti og Selfossi voru kallaðir út rétt fyrir klukkan 16 í dag eftir að eldur kviknaði í sinu í sumarbústaðalandi við suðurbakka Apavatns í Grímsnesi.
Nokkur hús og töluverður gróður voru í mikilli nálægð við eldinn sem brann á nokkuð stóru svæði en slökkviliðinu tókst að forða því að eldur bærist í húsin. Landslagið var hins vegar erfitt yfirferðar og þurfti að leggja út talsvert af slöngum til að ná tökum á ástandinu.
Slökkviliðið naut einnig liðsinnis Hjálparsveitarinnar Tintron sem mætti á svæðið með dróna til þess að mynda umfangið og hitamynda svæðið. Slökkvistarfi var lokið um klukkan 18.