Sumar og vetur frusu saman

Sumar og vetur frusu saman en víðast hvar á Suðurlandi var -1 til -3°C frost kl. 1 í nótt. Íslensk þjóðtrú segir það góðs viti og að heyfengur verði góður í sumar.

Í Þykkvabæ og á Hellu var -3°C kl. 1 og -2°C í Selvogi. Víðast í uppsveitum Árnessýslu var -1°C en eins stigs hiti var á Hjarðarlandi í Biskupstungum, eins og á Vatnsskarðshólum í Mýrdal og tveggja stiga hiti á Steinum undir Eyjafjöllum.

Í bókinni Sögu daganna segir Árni Björnsson að hvarvetna hafi verið fylgst með því hvort frost væri aðfaranótt sumardagsins fyrsta, þ.e. hvort saman frysti sumar og vetur.

Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.

Sunnlenska.is óskar lesendum sínum gleðilegs sumars.