Sumar og vetur frusu ekki saman

Við Laugarvatn á björtum vordegi. Ljósmynd/Jón Bjarnason

Sumar og vetur frusu ekki saman en hvergi á láglendi á Suðurlandi er frost í nótt. Frjósi sumar og vetur saman segir íslensk þjóðtrú það góðs viti og að heyfengur verði góður í sumar.

Einungis í Tindfjöllum var -1,1°C frost, á Hveravöllum var -0,2°C frost og á Hellisheiði 1,6°C hiti. Hlýjast var við ströndina; á Eyrarbakka var 5,6°C hiti og við Skarðsfjöruvita var 7°C hiti. Í uppsveitunum var einnig hiti en mælirinn í Skálholti í Biskupstungum var í 4,3°C á miðnætti.

Rjóminn jafn þykkur og ísskánin
Í bókinni Sögu daganna segir Árni Björnsson að hvarvetna hafi verið fylgst með því hvort frost væri aðfaranótt sumardagsins fyrsta, þ.e. hvort saman frysti sumar og vetur.

Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.

Frá því mælingar sunnlenska.is hófust árið 2010 hafa sumar og vetur jafn oft frosið saman en athygli vekur að síðastliðin fimm ár, eða frá árinu 2017 hafa sumar og vetur ekki frosið saman. Þrátt fyrir það hafa sumardagarnir undanfarin ár verið hlýir og sólríkir, ef frá er talið árið 2018, sem var skelfilega kalt rigningarsumar. Ritstjórn sunnlenska.is telur því – þrátt fyrir þjóðtrúna – talsverðar líkur á hlýju og góðu sumri 2021.

Sunnlenska.is óskar lesendum sínum gleðilegs sumars.