Nokkur kurr er meðal starfsmanna Matvælastofnunar vegna hugmynda um breytingar á stofnuninni, m.a. í þá veru að starfsmenn sem sinnt hafa eftirlitsstörfum í sjávarútvegi verði færðir frá höfuðstöðvum MAST á Selfossi norður á Sauðárkrók.
Sjávarútvegshlutinn var færður á Selfoss árið 2008 með sameiningu Landbúnaðarstofnunar, matvælasviðs Umhverfisstofnunar og matvælasviðs Fiskistofu. Málið mætir andstöðu innan stofnunarinnar og í yfirstjórn hennar og ekki er eining um það innan landbúnaðar- og sjávarútvegsráðuneytisins, en Jón Bjarnason landbúnaðar- og sjávarútvegsráðherra er talinn hallur undir tilfærsluna.
Miklar breytingar hafa átt sér stað innan eftirlitsgeirans á undanförnum fimm árum með tilheyrandi færslu á starfstöðvum og enn verður breyting á þar sem fækka á umdæmum héraðsdýralækna á þessu ári úr 14 í 6. Þá er jafnframt tekist á um verkaskiptingu Matvælastofnunar og heilbrigðiseftirlits sveitarfélaga. Allt þetta er til þess að auka á óvissu starfsfólksins að mati þeirra sem Sunnlenska ræddi við.
Guðni Ágústsson, sem á sínum tíma stóð fyrir flutningi Landbúnaðarstofnunar á Selfoss, sagðist í samtali við blaðið vonast til þess að stofnunin fengi að vera í friði þar sem hún væri, raunar ein fárra stofnana á landsbyggðinni. Sagðist hann telja öruggt að þingmenn kjördæmisins stæðu gegn meiriháttar breytingum sem yrðu til að draga úr vægi hennar.